ৰাজ্যৰ মাধ্যমিক পৰ্যায়ৰ শিক্ষকৰ পাৰস্পৰিক বদলিক লৈ এক গুৰুত্বপূৰ্ণ সিদ্ধান্ত গ্ৰহণ কৰিছে শিক্ষা বিভাগে। শিক্ষামন্ত্ৰী ডাঃ ৰণোজ পেগুৱে জনোৱা অনুসৰি, ৰাজ্যৰ ১,৩৪৪গৰাকী মাধ্যমিক পৰ্যায়ৰ শিক্ষকৰ পাৰস্পৰিক বদলিৰ আবেদন অনুমোদন কৰা হৈছে।
জানিব পৰা মতে, মাধ্যমিক পৰ্যায়ৰ শিক্ষকৰ পাৰস্পৰিক বদলিৰ বাবে মুঠ ১,৪৯৪খন আবেদন জমা পৰিছিল। ইয়াৰে ১,৩৪৪খন আবেদনত শিক্ষা বিভাগে অনুমোদন জনাইছে। অতি সোনকালে সংশ্লিষ্ট শিক্ষক-শিক্ষয়িত্ৰীসকলে আনুষ্ঠানিক জাননী লাভ কৰিব বুলি শিক্ষামন্ত্ৰীগৰাকীয়ে উল্লেখ কৰে।
এই ঘোষণা শিৱসাগৰ আৰু চৰাইদেউ জিলাৰ বানপীড়িত বিদ্যালয়সমূহ পৰিদৰ্শন কৰাৰ সময়ত কৰে শিক্ষামন্ত্ৰী ডাঃ ৰণোজ পেগুৱে। পৰৱৰ্তী সময়ত চৰাইদেউ জিলা আয়ুক্তৰ কাৰ্যালয়ত বিদ্যালয় শিক্ষা বিভাগৰ বিষয়াসকলৰ সৈতে এখন পৰ্যালোচনা বৈঠকো অনুষ্ঠিত হয়।
বৈঠকত বানৰ ফলত চৰাইদেউ জিলাৰ ১১০খন বিদ্যালয় ক্ষতিগ্ৰস্ত হোৱাৰ বিষয়টো বিস্তৃতভাৱে পৰ্যালোচনা কৰা হয়। বিদ্যালয়সমূহৰ গৃহ, শ্ৰেণীকোঠা, আচবাব, শিক্ষণ-শিকন সামগ্ৰী আৰু অন্যান্য আন্তঃগাঁথনিৰ হোৱা ক্ষয়-ক্ষতিৰ বিৱৰণ আলোচনা কৰি ক্ষতিগ্ৰস্ত বিদ্যালয়সমূহত অতি শীঘ্ৰে স্বাভাৱিক শিক্ষাৰ পৰিৱেশ ঘূৰাই অনাৰ বাবে প্ৰয়োজনীয় ব্যৱস্থা গ্ৰহণ কৰা হ’ব বুলি শিক্ষামন্ত্ৰীগৰাকীয়ে আশ্বাস দিয়ে।
মূল বিষয়সমূহ
- ৰাজ্যৰ ১,৩৪৪গৰাকী মাধ্যমিক শিক্ষকৰ পাৰস্পৰিক বদলিত অনুমোদন।
- মুঠ ১,৪৯৪খন আবেদনৰ ভিতৰত ১,৩৪৪খন আবেদন গৃহীত।
- অতি সোনকালে সংশ্লিষ্ট শিক্ষক-শিক্ষয়িত্ৰীয়ে আনুষ্ঠানিক জাননী লাভ কৰিব।
- চৰাইদেউ জিলাৰ ১১০খন বানপীড়িত বিদ্যালয়ৰ ক্ষয়-ক্ষতিৰ পৰ্যালোচনা।
- ক্ষতিগ্ৰস্ত বিদ্যালয়সমূহত স্বাভাৱিক শিক্ষাৰ পৰিৱেশ পুনৰ ঘূৰাই আনিবলৈ শিক্ষা বিভাগৰ আশ্বাস।